Queiman un tobogán en Caldas de Reis durante a noite festiva
Por Redacción
A celebración da noite de Defuntos cos actos propios do Samaín ou de Halloween saldouse sen incidencias de relevancia agás en Caldas de Reis onde unha persoa que se atopaba participando da festa decidiu prender lume a un tobogán dun parque infantil.
O incidente rexistrábase ao redor das 02.00 horas e ata o lugar desprazáronse efectivos de Protección Civil de Caldas, axentes da Garda Civil e da Policía Local.
Os integrantes de Protección Civil publicaron unha fotografía do suceso en Twitter e manifestaron o seu malestar polo comportamento do autor deste acto vandálico publicando: "Nin graza o individuo que fai estas cousas #halloween non é isto".
Segundo a información facilitada desde os diferentes parques de Bombeiros, Pontevedra, Salnés e Vilagarcía, non se rexistraron outros lumes nin incidencias durante esta noite festiva.