Unha trintena de veciños de Bordóns despachan co alcalde
Por Redacción
O alcalde de Sanxenxo, Gonzalo Pita, instalou este martes o seu despacho na Casa de Cultura de Bordóns, onde estivo acompañado pola edil de Medio Ambiente, Coral González-Haba; o concelleiro de Servizos, Maxi González e o de Turismo, Suso Sueiro.
Ao redor dunha trintena de cidadáns achegáronse ata as instalacións municipais en Bordóns para trasladar ao goberno demandas históricas nesta parroquia, sendo a máis insistente a dotación do servizo de saneamento ás escasas vivendas que aínda carecen do mesmo. As dificultades de acceso ás mesmas entorpece a instalación das tubaxes, segundo explicou o alcalde aos veciños demandantes, desprazándose nalgún caso para comprobar in situ o terreo.
Unha representación da asociación de veciños de Bordóns aproveitou tamén a estancia de parte do goberno na parroquia para reiterar demandas como a humanización de dúas rúas, Outeiro e Fontiña así como a mellora dalgúns camiños interiores.
O colectivo veciñal interesouse tamén polo proxecto de rehabilitación de muíños nesta parroquia, que levará a cabo co Obradoiro de Emprego aprobado a través da Mancomunidade do Salnés e que contempla a recupación de muíños en Vilanova, Meaño e Sanxenxo.
Outra das cuestións expostas polos cidadáns tivo que ver coa demanda de limpeza de diversas parcelas, da que tomou nota a edil de Medio Ambiente para tramitar a súa execución.
Gonzalo Pita continuará coa súa rolda de atención directa no rural a próxima semana. O día 19, e no mesmo horario de 9.30 a 13 horas, o despacho do alcalde instalarase na Casa de Cultura de Dorrón.