Nenos da Xunqueira II non irán a clase se se reincorpora a profesora acusada de maltrato
Por Redacción
O conflito xurdido no CEIP A Xunqueira II ante a denuncia dun grupo de pais que acusan á profesora dos seus fillos de maltratalos endurécese.
A ANPA do centro educativo, apoiada por Fanpa Pontevedra -a federación provincial-, tomou a decisión de que os alumnos que integran a clase da que esta mestra é profesora e titora non acudirán ao colexio se esta, que actualmente está de baixa, se reincopora ao seu posto de traballo.
Así o confirmaron nun comunicado conxunto enviado aos medios de comunicación, no que explican que optaron por esta saída antes a situación de "risco" para a integridade "física e psicolóxica" dos menores.
Ademais, acordaron que se Educación "insiste en descoñecer" esta situación, solicitarán aos pais do resto de alumnos do centro que se solidaricen cos afectados "de modo que tampouco asistan ás clases" para evitar que o problema acabe derivado a outro grupo de nenos do mesmo colexio ou doutro diferente.
No comunicado, a ANPA da Xunqueira II asegura que existe un "coñecemento estendido" dentro da comunidade educativa de Pontevedra dos "antecedentes da mesma natureza" que esta docente "vén arrastrando" ao longo dos últimos anos en diversos centros, polo que mostran o seu "desconcerto" polo "corporativismo" do claustro en defensa desta profesional.
Os pais reiteran que os menores afectados por estes supostos malos tratos están a comezar a revelar episodios de natureza física e psicolóxica "derivados da situación vivida no colexio", polo que reiteran que a solución deste incidente require a "máxima urxencia", xa que "a tensión e a angustia" que sofren continuará ata que non se adopten medidas "definitivas e tranquilizadoras".
Neste sentido, ambos os colectivos esixen que se complete a investigación aberta a esta profesora "con moita brevidade e con todas as garantías" tanto para os menores como para a propia docente, para a cal demandan que ata que se resolva este asunto sexa apartada da súa actividade laboral para que non poida estar en contacto cos alumnos.
Tanto os pais do centro como a Fanpa advirten ademais que estudarán a posibilidade de iniciar "calquera outra actuación de carácter xudicial, civil ou penal" que consideren necesaria para protexer a integridade dos alumnos afectados.