A Monxa do Penedo contará de novo en Cuntis cun Congreso
Por Redacción
O vindeiro sábado día 8 de outubro terá lugar en Cuntis, o seu pobo natal, o V Congreso sobre a figura de María Antonia de Jesús, popularmente coñecida como A Monxiña do Penedo.
Desde hai cinco anos e sempre no mes de outubro, coincidindo coa súa data de nacemento veñen celebrando estes congresos que este ano terá como relator principal ao monxe carmelita Augusto Guerra Sancho.
Ademais dunha visita a O Penedo, lugar de nacemento de tan ilustre carmelita, os participantes nesta cita desprazaranse ata Santiago de Compostela para visitar o Convento fundado por María Antonia e realizarán unha ofrenda floral ante o seu sepulcro.
Durante o congreso será presentada a Asociación Amigos da Monxa do Penedo que nace en Cuntis co gran obxectivo de arroxar luz sobre a figura de María Antonia de Jesús, unha cuntiense nada no século XVIII, fundadora e introductora da Orde do Carmelo en Galicia e primeira escritora mística galega.
Chamada a ser canonizada ao ano seguinte da súa morte, o proceso de canonización foi interrompido aínda que reaberto case dous séculos máis tarde por Rouco Varela. Na actualidade, tras superar este ano a fase de estudo dos historiadores e dos teólogos, estase á espera de que os cardenais fagan a proposta ao Papa.