Cotobade cumprirá co plan económico-financieiro sen medidas de axuste
Por Redacción
O Concello de Cotobade pechou a primeira metade do ano con 504.963 euros de superávit e o cumprimento "absoluto" do principio de estabilidade orzamentaria, segundo datos oficiais da Intervención Municipal sobre o estado das contas.
Así, o resultado orzamentario bruto favorable en máis de 500.000 euros enxuga sobradamente a totalidade do déficit co que se saldou a conta xeral de 2015.
En todo caso, cabe lembrar, segundo o ditame elaborado hai meses por Intervención, que o déficit de máis de 300.000 euros debeuse a "un cambio do criterio contable do rexistro de subvencións recibidas doutras administracións públicas" e a "un desfase temporal entre o gasto e o ingreso afectado que provoca o incumprimento do principio de estabilidade orzamentaria e que se corrixirá previsiblemente co recoñecemento de dereitos no exercicio 2016 xerando probablemente a situación inversa, máis ingreso que gasto".
Neste punto, o alcalde de Cotobade, Jorge Cubela, explicou que a actuación do goberno local no manexo das contas municipais en 2015 foi "estremadamente correcta e axeitada" e que o déficit co que se saldou o exercicio debeuse ao retraso na asunción de obrigas e de pagos por parte doutras administracións, sobre todo a Deputación de Pontevedra.
INVESTIMENTOS RECORD
A consecución deste superávit prodúcese ademais malia a realización de investimentos récord no municipio, xa que no que vai de ano comprometéronse, asináronse ou adxudicáronse actuacións en obras e servizos por 3,66 millóns de euros.
As principais actuacións correspóndense co saneamento integral de Tenorio (1,85 millóns de euros), a primeira fase da mellora da PO-234 (633.000), a instalación do Centro Autonómico de Recuperación de Fauna Salvaxe (600.000), a renovación do firme na estrada PO-232 entre Carballedo e San Xurxo de Sacos (150.000) ou a humanización da contorna da igrexa de San Pedro de Tenorio no marco do Plan Hurbe (123.000), así como outras partidas e subvencións que roldan os 400.000 euros e que se centran en saneamentos, parques infantís, melloras enerxéticas, traballos en pistas e camiños ou extinción de lumes forestais, entre outras.
Finalmente, os datos de Intervención tamén revelan que o pago medio a provedores sitúase en 24 días tras unha importante rebaixa dende os 33 do trimestre anterior e superando as previsións que apuntaban a que sería de 29 no presente exercicio.
Por todo isto, Cubela garantizou que o Concello de Cotobade vai cumprir sobradamente co plan económico-financieiro sen necesidade de aplicar ningunha medida de axuste e amosou a súa satisfacción porque se proxecta unha liquidación económica "moi favorable", recuperando os datos de estabilidade dos anos 2012, 2013 e 2014 que se perderon o pasado exercicio "por causas alleas ao Concello e á xestión municipal".