O porto deportivo de Sanxenxo incrementou os amarres nun 12% durante este verán
Por Redacción
A empresa Nauta Sanxenxo que xestiona o Porto Deportivo Juan Carlos I ofreceu o dato de que os amarres temporais durante este verán incrementáronse nun 12,6% con respecto aos meses de xullo e agosto de 2015.
187 embarcacións recalaron durante o mes de xullo nestas instalacións municipais, fronte ás 161 que escolleron a rada sanxenxina no mesmo mes durante 2015. En agosto, as cifras incrementáronse alcanzando os 215 barcos en tránsito fronte aos 197 do ano pasado.
A bandeira española foi a que ondeou maioritariamente nestas prazas, mentres que os barcos franceses encabezaron este verán a listaxe de embarcacións estranxeiras. Tamén se rexistrou a visita de máis dunha ducia de barcos británicos, 16 portugueses ou 10 holandeses, entre outros.
As embarcacións de vela predominaron sobre as de motor con 143 fronte a 72. O vicepresidente de Nauta Sanxenxo, Jesús Sueiro, destaca o feito de que o porto incremente os amarres temporais de embarcacións con bandeira estranxeira débese a que as instalacións son de primeira orde recoñecidas a nivel internacional ao dispoñer duns servizos de calidade. O porto conta con titularidade municipal cunha lámina de auga de 85.000 metros cadrados e 450 amarres de entre 8 e 45 metros.