Ponte Caldelas ofrécese para acoller ao alumnado da Lama
Por Redacción
O goberno local de Ponte Caldelas acordou ofrecer á Consellería de Educación a súa total disposición a colaborar para que os alumnos do colexio de A Lama, afectados pola suspensión das clases derivada do retraso nas obras da cuberta do seu centro, podan ter acollida temporal no colexio Manuel Cordo Boullosa.
O alcalde, Andrés Díaz, así llo ofreceu esta ao xefe territorial de Educación, César Pérez Ares, e ao alcalde de A Lama, Jorge Canda.
O goberno local tripartito acordou dar este paso a suxestión do concelleiro nacionalista Manuel Barreiro, quen tamén é director do colexio Cordo Boullosa, e, por tanto, coñecedor de primeira man das posibilidades existentes.
O Concello de Ponte Caldelas deixa claro que son competencias da Consellería de Educación, ao mesmo tempo titular dos edificios dos colexios. Non obstante, aos concellos correspóndelle asumir os gastos relativos ao mantemento e conservación. É neste eido competencial no que o Concello caldelán adianta a súa vontade de leal cooperación, "como sempre tentamos facer con todas as administracións".
Dende o equipo de goberno subliñan que a convivencia dos alumnos de Ponte Caldelas e de A Lama unicamente tería que condicionarse á impartición das clases en horario de tarde, posto que o centro non ten capacidade para encaixalas completamente no horario lectivo habitual. "Sabemos que non se soluciona todo, pero, por se a comunidade educativa e a Consellería o estiman convinte, aí vai a nosa oferta", explica o alcalde na comunicación enviada a Pérez Ares.
O colexio Manuel Cordo Boullosa ten uns 290 alumnos matriculados, mentres que no de A Lama hai outros 90. O operativo de desprazamento sería, deste xeito mínimo, e os rapaces non perderían clase máis días dos estritamente necesarios. "É un xesto de irmandade entre dous municipios veciños e amigos que, estamos seguros, tamén se faría á inversa", explica Díaz.
Finalmente, no correo enviado ao xefe territorial de Educación, o alcalde de Ponte Caldelas invítao "con cordialidade" a investir na mellora dos colexios de Ponte Caldelas "nos mesmos termos e condicións coas que o ten feito nos colexios da bisbarra onde a Xunta de Galicia asume o 100% do custo das obras". Andrés Díaz conclúe lamentando que se desaproveitara este verán para dotar ao colexio de A Reigosa dun comedor escolar que é moi necesario e demandado "a pesar de que o Concello redactou o proxecto técnico e mesmo ofertou asumir o 50% do orzamento".
Relacionadas:
-
Pactan retomar as clases no CEIP A Lama a partir do luns 19
Por Redacción |
-
Educación estuda coa empresa a volta ás aulas dos alumnos do colexio da Lama para o vindeiro luns
Por Redacción |
-
Suspenden as clases no CEIP A Lama polos estragos causados pola chuvia
Por Redacción |
-
Volta ao cole sen incidentes
Por Oskar Viéitez & Cristina Saiz |