Identifican un furtivo que 'andaba á navalla' en Raxó
Por Redacción
Axentes do servizo de Gardacostas de Galicia requisaron na Ría de Pontevedra 437 aparellos de pesca e máis de 105 quilos de marisco, a maioría polbo, no marco de varios controis contra o furtivismo realizados no que levamos de mes de agosto.
Segundo a información facilitada por este servizo, dependente da Consellería do Mar, unha das actuacións máis significativas realizouse en Raxó en colaboración coa Garda Civil e saldouse coa identificación dunha persoa que presuntamente extraía navalla de xeito ilegal.
Neste operativo en Raxó tamén incautaron un vehículo e un equipo completo de mergullo e procederon ao comiso de máis de 18 quilos de navalla que presuntamente foi froito de actividades de furtivismo.
Ademais, outro control realizado na Ría de Pontevedra deu como resultado a incautación de 100 nasas sen identificar e o comiso de máis de 17 quilos de polbo e preto dun quilo de nécora.
Neste mes de agosto os gardacostas requisaron en Galicia máis de 800 útiles de pesca e de 400 quilos de peixe e marisco en diferentes controis contra o furtivismo e os inspectores da Xunta tamén se fixeron con máis de 1.000 metros de artes de enmalle.
Relacionadas:
-
Os gardacostas requisan aos furtivos máis dunha tonelada de peixe e marisco
Por Redacción |
-
Incautan máis de 140 quilos de bivalvos nun operativo de control na autoestrada AP-9
Por Redacción |
-
Uns furtivos afunden o seu propio barco en Carril ante a presenza do servizo de Gardacostas
Por Redacción |