Deputación elaborará un estudo para urbanizar a estrada provincial en Carballedo
Por Redacción
A Deputación de Pontevedra realizará un estudo de mobilidade para analizar a posibilidade de urbanizar a estrada provincial situada no núcleo de Carballedo (Cotobade), unha das actuacións consideradas prioritarias para este concello.
O obxectivo desta actuación sería dotar de aparcadoiro ao tramo que dá acceso ao centro médico e acometer unha urbanización respectando a singularidade do núcleo de poboación, segundo sinalaron o deputado de Mobilidade, Uxío Benítez e o alcalde de Cotobade, Jorge Cubela, nunha visita a esta estrada.
Tras coñecer a situación da vía, Benítez anunciou que este estudo proporá actuacións solicitadas en consonancia co novo decálogo de actuacións en estradas provinciais e segundo parámetros de mobilidade sostible.
O estudo que realizará a Deputación responde a unha demanda para reorganizar os fluxos de tráfico nunha zona de gran afluencia de vehículos, principalmente por ser onde se sitúan o centro médico, a casa consistorial e outros servizos, e para dotala de zona de estacionamento, da que carece na actualidade e que se fai moi necesaria para que a veciñanza poida acceder aos servizos médicos e administrativos con certa seguridade.
Uxío Benítez tamén aproveitou para visitar o núcleo de Carballedo, lugar no que se celebra un mercado mensual e que acolle regularmente outras citas lúdicas, para coñecer as particularidades da zona e poder contemplalas no estudo técnico da urbanización deste tramo de vía provincial.
Cotobade conta con nove estradas provinciais: Carballedo-Caroi, Caroi -A Lama, Carballedo-Rebordelo, Viascón-Cuspedriños, Xesteira-Almofrei, Vilanova-Tenorio, Borela-Pontecaldelas, Parada-Tenorio, e Paraños-Piscifactoría; e entre todas suman máis de 34,4 quilómetros.