Preto de 70 scouts galegos desenvolven o seu campamento en Cotobade
Por Redacción
O grupo Semente de Asbe Scouts de Galicia está a desenvolver, dende este luns, unha nova edición do seu campamento en Cotobade tras escoller esta zona polos seus importantes recursos naturais e medioambientais, a existencia de moitas zonas boscosas, a súa agradable climatoloxía, o potencial do observatorio astronómico e dos roteiros de sendeirismo, as coidadas zonas de baño e a boa acollida por parte dos veciños.
O grupo Semente permanecerá en Cotobade durante case dúas semanas, ata o vindeiro 30 de xullo, pernoctando en tendas de campaña no campo de fútbol de Sión, que foi cedido polo Concello para seguir favorecendo as accións turísticas e xuvenís na zona. En total, o campamento está conformado por preto de 70 persoas, entre monitores e scouts, procedentes de distintos puntos de Galicia.
Xa na súa primeira xornada en Cotobade, recibiron a visita do alcalde, Jorge Cubela, que doulles a benvida ao municipio, interesouse polas súas actividades e pola organización e agradeceulles que escolleran esta zona para desenvolver o seu campamento.
Con esta actividade, o Concello está a confirmar os seus grandes valores turísticos e medioambientais e a súa gran aposta polas iniciativas xuvenís en todos os ámbitos, xa que o campamento dos scouts únese ao campamento municipal Campalledo 2016, que está a desenvolver a súa quinta edición en dúas quendas con máis de medio cento de participantes, e ao Campo Internacional de Traballo que se celebrará no mes de agosto.