Marín fai unha valoración "positiva" das Festas do Carme
Por Redacción
Coa tradicional tirada de fogos de artificio, Marín deu por finalizada os seus festexos patronais, as Festas do Carme. Una semana que desde o goberno municipal cualifican como "positiva" e que permitiu que a vila estivera chea de xente.
As liñas mestras do traballo municipal foron intentar mellorar toda esta oferta festiva, con especial dedicación ás luces, ás orquestras, aos fogos, á batalla de flores, ás actividades destinadas ao público infantil, ás actuacións musicais no parque Eguren e a toda a programación do propio día do Carme.
O bo tempo e as noites con excelentes temperaturas facilitaron o ambiente nas terrazas e nos bares e a numerosa presenza de xente na entrega de despachos da Escola Naval tamén axudou a animar a vila durante todos estes días.
Ademais, o goberno municipal quixo agradecer todo o traballo realizado por servizos como a Policía Local, as brigadas municipais, a empresa de limpeza viaria, Protección Civil ou os voluntarios que colaboraron co normal desenvolvemento das festas.
Nomeadamente desde o Concello destacaron o labor da confraría da Virxe do Carme, a participación dos confrades e os remolcadores de Antonio Alonso, que contribuíron a que a procesión fora concorrida e moi participativa.
As festas do verán continúan esta fin de semana en Seixo e no casco urbano para tratar de repartir as actividades que terán continuidade todas as fins de semana do verán, ofrecendo ocio, música, promoción do comercio, gastronomía e deporte.