Chega ao Provincial o programa 'Ponte guapa, te sentirás mejor' para mellorar a autoestima e o ánimo ás pacientes con cancro
Por Redacción
Sentirse ben con unha mesma é especialmente importante durante a etapa do tratamento oncolóxico e para lograr que as mulleres que padecen a enfermidade den un paso nesta vía, a Fundación Stanpa e a Estrutura de Xestión Integrada de Pontevedra e O Salnés puxeron en marcha o primeiro taller de cosmética e maquillaxe dirixido a pacientes da área de Oncoloxía de Hospital Provincial.
A iniciativa, bautizada 'Ponte guapa, te sentirás mejor' busca dar ferramentas ás pacientes para que poidan afrontar a súa enfermidade cunha maior confianza e recuperar o ánimo.
A primeira sesión celebrouse este xoves e nela participaron Eugenia e Patricia, dúas pacientes oncolóxicas que agradeceron a actividade porque, en boca das asistentes, "cando teño quimioterapia, vexo a moitas compañeiras que entran desanimadas, penso que o feito de verse ben a unha mesma, verse guapa, é algo moi positivo, e non só para ti, senón para a túa propia familia". Á vindeira sesión esta muller irá con maior ánimo e recoméndalle a todas as pacientes do servizo que acudan ao taller, pois "foi fantástico".
Outra das asistentes asegura que "compartir este momento con compañeiras que nin coñecía foi toda unha experiencia", pois nas sesións de quimioterapia "podes falar, pero case sempre é sobre a enfermidade, sobre todo se atopas a alguén que está pasando polo mesmo ca ti", pero neste taller, ademais de aprender técnicas novas de maquillaxe, "estás entretida e pasas un momento agradable".
"Sentes que non estás soa nisto, e tamén é unha forma de deixar os problemas á marxe, de esquecerse de todo", agradecen as pacientes desta primeira experiencia en declaracións recollidas polo gabinete de comunicación do Hospital. O obradoiro seguirá a celebrarse en próximas sesións dirixido a calquera muller con tratamento oncolóxico ou que está a piques de inicialo e queira participar.
Durante a sesión, dúas esteticistas profesionais guían ás pacientes ao longo de doce pasos para recuperar o seu aspecto natural, dende a limpeza e a hidratación da pel ata a corrección de imperfeccións e a aprendizaxe de técnicas de maquillaxe.
'Ponte guapa, te sentirás mejor' busca ofrecer unha actividade diferente para as pacientes oncolóxicas con obxectivo de que poidan reducir os niveis de ansiedade ocasionados pola enfermidade e facilitar a súa interrelación coas persoas que as rodean, especialmente con aquelas que están pasando por unha situación semellante. Parte da base de que, durante o tratamento oncolóxico, o corpo, o cabelo ou a pel poden experimentar importantes cambios, polo que adaptar os coidados ás novas necesidades do organismo é fundamental.
Este programa naceu en Estados Unidos hai máis de 25 anos e estendeuse por diferentes países, de tal maneira que preto de 1,4 millones de pacientes foron atendidas a nivel internacional. En España lévase a cabo nun total de 16 hospitais, aos que se acaba de sumar o Provincial de Pontevedra.