O Concello saca a artillería contra as críticas do BNG e enumera todas as tarefas e persoal de limpeza de Marín
Por Redacción
O Concello de Marín defendeu este martes o funcionamento do servizo de limpeza ante as críticas realizadas polo grupo municipal do BNG pola "lamentable" imaxe que dá o municipio aos visitantes ao "non recibir a limpeza que os servizos municipais están obrigados a prestar". Recoñece que é "evidente" que as peticións son infinitas e os recursos persoais e económicos "limitados", pero asegura que o equipo de goberno está a realizar "un labor importante e constante" na mellora, limpeza, roza e mantemento de moitas zonas para as que teñen unha planificación realizada que se está executando.
"A súa crítica non me parece que contribúa a facer un reflexo real do gran esforzo en medios persoais e económicos que realizados dentro das posibilidades municipais", indica a alcaldesa, María Ramallo, nun comunicado no que asegura que hai semanas as brigadas municipais realizaron o chorreo de varias zonas e, ademais, manteñen unha limpeza constante e continúa nas zonas que reciben un importante número de persoas. Os distintos servizos de obras, limpeza e xardíns realizan "tarefas ordinarias" e outras "de maneira puntual" cando son necesarias.
En relación co persoal que executa estes traballos, recoñecen que aínda que teñen persoal contratado de maneira temporal, tamén teñen persoal de vacacións que en época estival forma parte do persoal municipal, pero que goza en períodos de días libres. Esta situación eméndase co reforzo de persoal coa contratación externa de servizos e actuacións que deben ser prestados.
Estes 'servizos especiais' que se externalizan son o baleirado das fosas sépticas nas praias, o baleirado de papeleiras, a limpeza en xornada de tarde e fins de semana das zonas e rúas máis utilizadas do centro urbano, limpezas intensivas e puntuais con motivo de San Juan, dos diferentes eventos que haberá na programación das festas do Carmen e na mellora das zonas que son realizadas pola varredora tratando de axustarse aos horarios, ás terrazas, ás zonas de realización de eventos e a tratar de que todo presente un mellor aspecto.
Ademais, a empresa Xoán XXIII realiza rozas a man, estando nestes momentos xa realizadas en todos os accesos ás praias, as zonas de Loira, Moledo, Montecelo, partes de Ardán e practicamente a totalidade da parte alta de Cantodarea e Pedreiras. E contratouse un tractor para traballar nas zonas do rural máis altas, zonas de estrada e vías municipais que a estas alturas do mes de xullo xa rozou practicamente a parroquia de Santomé, estando agora realizando labores de limpeza en zona de O Campo e posteriormente realizaraas en San Xulián, en Seixo.