Un proxecto conxunto do CHOP e Belas Artes é finalista dos premios Manancial 2016
Por Redacción
En 2014 un milleiro de grullas de papel encheron de vitalidade a zona de día de Psiquiatría do Complexo Hospitalario Universitario de Pontevedra. Era un dos traballos conxuntos realizados entre pacientes da área de Psiquiatría e alumnado da Facultade de Belas Artes, que acabou dando nome ao conxunto do proxecto de colaboración entre a institución académica e a sanitaria.
Dende aquela as colaboracións continuaron e hoxe este traballo é un dos catro finalistas aos Premios Manantial 2016, na categoría Premios Miradas, galardóns dirixidos a premiar a aquelas iniciativas e profesionais que cos seus proxectos axudan a mellorar a calidade de vida das persoas con problemas de saúde mental.
O resultado máis positivo deste proxecto, co que tamén se perseguía a humanización de diversos espazos do hospital, foi acadar un incremento do 70% na participación e implicación dos pacientes desta unidade en actividades de grupo, con respecto a anteriores intervencións no Hospital de Día Psiquiátrico.
Así mesmo, tras unha valoración do plan de humanización, recolléronse as impresións dos profesionais sanitarios e dos doentes e o grao de satisfacción dos mesmos foi do 90%.