Poio, a gran referencia da noite de San Xoán na comarca
Por Alejandro Espiño
Un total de 120 fogueiras volverán converter a Poio nunha das grandes referencias da noite de San Xoán na comarca de Pontevedra.
Segundo consta nas solicitudes aprobadas polo Concello, 29 faranse nas praias do municipio, excepto en Xiorto e Cabeceira onde están prohibidas ao ser areais con bandeira azul.
Na parroquia de San Xoán será, como é habitual, a zona de Poio onde o lume alumará con máis forza, con 56 fogueiras acesas a partir das doce da noite.
O Concello ten preparado un operativo especial por parte dos voluntarios de Protección Civil e da Policía Local que velarán porque unha noite de festa e diversión non acabe en desgraza.
A máis importante das fogueiras que se acenderán seguirá sendo a que organiza o propio Concello de Poio en A Seca. Será precedida, a partir das nove e media da noite, da tradicional sardiñada popular con prezos alcanzables para todos os públicos. O encendido da fogueira está previsto para as 23.30 horas.
MARÍN
En Marín tamén son máis de 100 os particulares ou asociacións que solicitaron permiso para facer a súa tradicional fogueira de San Xoán. Ademais, tamén haberá festas organizadas no ámbito das praias e os seus chiringuitos, aínda que está prohibido facelo sobre a area; e outra fogueira organizada pola Asociacion Festimar, na que colabora o Concello de Marin, e que estará situada no parque de Cantodarea.
O dispositivo de seguridade está organizado, así como tamén o de limpeza o día seguinte para que as praias poidan ser utilizadas ao día seguinte con total normalidade.
PONTE CALDELAS
En Ponte Caldelas tamén crece a tradición de San Juan, ao case duplicarse a solicitude de fogueiras con respecto ao ano pasado. Así, autorizáronse 45 fogueiras. Segundo o goberno municipal iso implica que case todos os lugares das nove parroquias do municipio terán, polo menos, unha fogueira nesta máxica noite.
Durante toda a noite, a Policía Local e o camión motobomba municipal estarán alerta para atender calquera incidencia que poida xurdir e atender ao cumprimento das normas.
A LAMA
Pola súa banda, unha ducia de fogueiras de San Xoán foron solicitadas e autorizadas polo Concello da Lama e remitidas ao Distrito de Incendios da Consellería do Medio Rural da Xunta de Galicia para que teña constancia das mesmas durante a noite do 23 de xuño.
BUEU
No Concello de Bueu foron moitas as persoas que solicitaron a realización de fogueiras tanto en terreo público como privado. As praias de Mourisca, Ancoradouro, Tuia, Banda do Río e o parque de Xexide e A Estacada serán os escenarios das fogueiras que se prenderán hoxe en terreos públicos.
Ademais, están expresamente prohibidas as fogueiras nas praias co distintivo de bandeira azul (Area de Bon, Portomaior, Lagos e Lapamán) así como no resto dos espazos naturais protexidos do termo municipal.
REQUISITOS DAS FOGUEIRAS
En todas estas localidades, de acordo coa normativa autonómica, as fogueiras non poderán situarse a menos de 20 metros das casas. Nese perímetro tampouco pode haber coches ou vehículos de tracción mecánica nin, por suposto, depósitos de combustible ou almacéns de sustancias especialmente inflamables.
En todo caso, queda terminantemente prohibido a realización de fogueira en terreo forestal.
As fogueiras faranse, do mesmo xeito, en buracos o máis profundos posible e debidamente rodeados de pedra ou dunha pequena gabia. Ademais, teranse a man mangueiras, extintores ou polo menos auga para uns 20 cubos, cos correspondentes caldeiros.
Nelas, queda prohibido queimar rodas, plásticos ou calquera material inflamable, especialmente combustibles, coa excepción das madeiras. Do mesmo xeito, non se utilizarán materiais tales como papeis, cartóns ou ramas de eucalipto, que co vento poidan provocar faíscas incandescentes que causen posibles incendios.
Os lumes deberán ser pequenos nun primeiro momento, botarase a leña progresivamente e, finalmente, nunca superarán unha dimensión tal que impida sufocalos con suficiente rapidez e os seus restos deberán ser retirados ou enterrados ao terminar.
Os organizadores tamén terán que dispoñer dun pequeno botiquín de primeiros auxilios especialmente equipado para as queimaduras.