O Museo de Pontevedra, exemplo para un museo do sur de Inglaterra
Por Redacción
Coa última ampliación do Museo de Pontevedra, o Sexto Edificio e o Sarmiento quedaron unidos por unha pasarela acristalada. Esa solución arquitectónica é a mesma que queren utilizar os responsables do Poole Museum, situado no sur de Inglaterra, para unir varias das súas estancias, polo que contactaron coa dirección do centro pontevedrés para coñecer os detalles da obra.
A solicitude chega despois de que o seu director, David Hatkings, visitase no transcurso dunha viaxe particular os edificios do Museo de Pontevedra o pasado mes de setembro. No seu escrito, Hatkings cualifica a pasarela como "unha opción moi elegante" para integrar dous edificios de diferente época histórica.
O Poole Museum está situado en Dorset, na costa sur de Inglaterra, e os seus fondos están repartidos entre catro sedes. Os dous edificios que están valorando conectar, e que neste momento están separados por unha rúa estreita e peonil, son o denominado Scaplen's Court, de orixe medieval, e un edificio do século XIX que antes fora sede da biblioteca pública, fundada en 1830.
Este último edificio, denominado 'the new atrium building' foi obxecto dunha reforma entre os anos 2005 e 2007, durante a que se lle incorporou unha zona acristalada e se habilitou unha terraza para que os visitantes dispoñan de vistas da cidade antiga e da zona do porto.
Nos vindeiros días, desde o Museo de Pontevedra enviaráselle ao director do Poole Museum a información solicitada así como o contacto dos arquitectos que realizaron o proxecto, que xa foron informados do interese do museo inglés.
O Poole Museum é unha institución museística que recolle e preserva fundamentalmente a historia local, con coleccións dividas en ámbitos como a historia marítima, a cerámica da zona, a historia oral, a prehistoria e arquivos fotográficos e cartográficos, entre outros. Abriu as súas portas en 1989 e a súa peza central é o Poole Logboat, unha embarcación datada na idade de ferro e que foi atopada en 1964 durante os traballos de dragado no porto desta cidade.