As obras do paseo en Loira están a piques de rematar
Por Redacción
O Ministerio de Medio Ambiente a través da Dirección Xeral de Costas está a executar as obras da ampliación do Paseo en Loira, que xa entraron na súa recta final.
É unha obra importante que sen dúbida mellorará os accesos para peóns, ampliando cunha pasarela de madeira voada na parte máis estreita do paseo, tratando de ordenar a circulación.
O proxecto que se está executando trata de que se independice o tránsito dos peóns e dos vehículos nos 100 primeiros metros da actuación, desde o punto en que finaliza o paseo existente actualmente.
O orzamento base para a licitación ascendeu a 314.389 euros, unha importante obra que se xestionou desde o Concello de Marín.
As obras levan a cabo co obxectivo moi demandado de humanizar ese lado da praia e conseguir que os accesos e a circulación conten cun espazo mellor, máis ordenado, que evite complicacións no verán e que sexa utilizado polos veciños que alí viven todo o ano de maneira cómoda e fácil.
O obxectivo é que este verán se poida gozar, esperando que o tempo permita os seus avances e nas próximas semanas se chegue á súa finalización quedando pendentes de definir os aspectos máis relevantes da circulación viaria e da mellora da accesibilidade.