José Millán, pechado por obras a partir do martes
Por Redacción
A rúa José Millán permanecerá pechada ao tráfico a partir das 10.00 horas deste martes 24 para permitir a execución das obras de reforma previstas polo Concello, unha actuación integral que se prevé que se prolongue a longo dos próximos tres meses.
Durante o tempo que duren as obras, a rúa pecharase totalmente ao tráfico, pero permitirase o acceso a garaxes. A Policía Local deseñou un operativo de tráfico para reducir as molestias aos veciños da zona e demais condutores, de tal maneira que se permitirá acceder á rúa San Antoniño a través da rúa Lepanto.
A obra adxudicouse á empresa Covsa por 240.000 euros e contempla un tratamento de bandas segregadas, cunha distinción física de materiais entre os distintos usos, que serán un carril de tráfico rodado realizado en aglomerado e beirarrúas realizadas en lousa de cemento. A beirarúas estará confinada por bandas de pedra e separada do carril de tráfico por un bordo con diferencia de nivel semellante ao das rúas circundantes, de tal maneira que os tráficos peonís estarán priorizados fronte aos rodados.
Tamén está prevista a substitución e instalación de servizos como as redes soterradas de abastecemento de auga potable ou gas natural, o alumeado público e as canalizacións de subministro de enerxía eléctrica, canalización telefónica e de cable de fibra óptica.
Dende o Concello de Pontevedra lembran que a rúa José Millán presenta nestes intres uns espazos públicos "desaxeitados e obsoletos" que están a dificultar a súa utilización por parte dos veciños. Polo tanto, "resulta congruente a súa priorización como ámbito de actuación cara a conseguir a completa transformación da zona para o uso e disfrute".