O PP carga contra os cambios no programa de balnearios da Deputación e augura retrasos ata outubro
Por Redacción
O Partido Popular cargou esta fin de semana contra o novo programa de balnearios da Deputación Provincial de Pontevedra, o bautizado como plan Depotermal, que aglutina os que anteriormente se coñecían como Saúde e Benestar e Coidarte. O grupo provincial 'popular' denuncia que hai un retraso importante na posta en marcha de todos os programas de servizos sociais, e en especial deste e advirte que os retrasos na adxudicación do programa provocarán que as persoas maiores non poidan acudir aos balnearios ata o mes de outubro.
Segundo denuncian, eses retrasos farán que sexa complicado dar resposta a toda a demanda nos tres únicos meses. "Perderon a metade do ano en pensar como facelo diferente ao PP, en definir os programas e darlle voltas para que non se pareza aos que había, para finalmente mantelos pero cambiándolle o nome", critica a voceira dos 'populares', Nidia Arévalo.
Nidia Arévalo insiste en que os prexudicados, unha vez máis, son os cidadáns da provincia, "as persoas maiores que aínda non puideron disfrutar das súas estadías nos balnearios e as que van quedar fóra do programa". Tamén cre que sae prexudicado o sector hostaleiro, que "ata o de agora tivo un importante revulsivo e apoio durante os meses de tempada baixa con esta actividade".
O PP explica que nas convocatorias anteriores a estas alturas a metade dos maiores que se beneficiaban destes programas xa estaban gozando das súas estadías nos balnearios da provincia. O programa comezaba en febreiro, suspendíase durante a tempada alta e retomábase en outubro, polo que este ano haberá a metade de meses para atender a todas as solicitudes. Segundo denuncian, este ano reduciron as prazas ofertadas en 1.200, pero é que ademais non van ser capaces de cubrir en tres meses o resto de solicitudes.
"Temos medio ano perdido, e está por ver cantos maiores van quedar fóra do programa. Polo momento xa son seguro 1.200 persoas, pero estamos convencidos de que esta cifra vai verse incrementada", critica Arévalo, que advirte que vai pasar exactamente o mesmo, ou incluso peor, co programa 'En ruta coa Depo', o que anteriormente se chamaba 'Coñece a túa provincia', porque a día de hoxe aínda non hai prevista nin unha data para a adxudicación.
Relacionadas:
-
O programa de balnearios ábrese ás persoas sen recursos
Por Oskar Viéitez |
-
Os balnearios pontevedreses volven abrir as súas portas ao programa Depotermal
Por Redacción |
-
A Deputación reformulará o programa de termalismo, que tivo 3.760 beneficiarios nun ano
Por Redacción |
-
Abre o prazo de solicitudes para un novo programa de balnearios da Deputación
Por Redacción |