O Areeiro avisa: comeza o periodo de risco por oídio nas viñas da provincia
Por Redacción
A Estación Fitopatolóxica do Areeiro lanza un aviso fitosanitario polo inicio do período de risco para a aparición de oídio nas viñas da comarca, polo que aconsella incrementar a vixilancia.
Así mesmo, aínda non se teñen detectado os primeiros síntomas do mildeu nin nas variedades máis sensibles, mais, en todo caso, o estado de prefloración marca o inicio dun período de risco para as viñas fronte a esta enfermidade. As condicións climáticas son favorables ao desenvolvemento do fungo, polo que é preciso incrementar a vixilancia.
Ademais, é preciso renovar os tratamentos contra o mildeu nos vindeiros días tendo en conta que se achega o inicio da floración. Se o viñedo aínda se atopa dentro do período de protección teórico do tratamento anterior pode retrasarse a nova aplicación, pero sen olvidar que é importante manter o viñedo protexido para evitar danos á colleita potencial.
En canto ao 'black rot', esta semana os técnicos detectaron un incremento dos síntomas da enfermidade e a súa extensión a todas as comarcas da provincia. Na actualidade non se estima necesario realizar ningún tratamento, pero advírtese que a receptividade dos acios a este patóxeno aumenta sensiblemente dende a floración.
En relación co melocotoeiro e as pavieiras, a semana pasada indicábase que a loita contra o fungo da lepra debe realizarse desde o inicio da campaña, ademais dos pertinentes tratamentos invernais con cobre, mais, en calquera caso, os propietarios que non tiveran realizado ningunha actuación podían aplicar o fuxicida. Nesta semana débese ter en conta que o tratamento é de contacto, polo que se debe renovar a aplicación en lugares que teñan sufrido moita choiva.
No caso do kiwi, é preciso renovar os tratamentos contra a bacteriose cando desaparezan as chuvias e se estabilice a climatoloxía, xa que debido ás precipitacións os funxicidas cúpricos aplicados estarán lavados.