Os ambulantes rexeitan trasladar a feira a Tafisa e seguirán en Rafael Areses
Por Redacción
A feira dos sábados non se moverá para os antigos terreos de Tafisa. A celebración o próximo 21 de maio dunha proba deportiva ía servir para probar se funcionaría o mercado nesta nova zona da cidade. Pero o rexeitamento dos ambulantes provocará un cambio nestes plans.
O concelleiro delegado de Mercados, Vicente García Legísima, mantivo unha reunión cos vendedores da feira ambulante na que se acordou manter o mercado semanal na rúa Rafael Areses como ata o de agora.
Aínda que nun primeiro momento un grupo de vendedores amosouse de acordo, finalmente a maioría dos ambulantes acordaron, tras visitar a parcela escollida en Tafisa para acoller o mercadiño, non aceptar este traslado.
A súa proposta era trasladar a feira ben á praza de Barcelos ou ben á Alameda, opcións que non aceptou o Concello.
O día 21 de maio, cando se celebran as Copas do Rei e da Raíña de tríatlon na cidade, terase que suspender.