Demostran que os libros de Educación Física promoven un modelo de corpo masculino e novo
Por Redacción
A investigadora Alba González denuncia a visión estereotipada que se mostra nos libros de texto de Educación Física da ESO. A principal conclusión da tese presentada por González Palomares baixo a dirección da profesora da Facultade de Ciencias dá Educación e do Deporte de Pontevedra, Ana Isabel Rey e de María Inés Táboas, é que se ofrece a imaxe dun modelo masculino, novo e sen discapacidade.
Esta análise dedúcese despois de revisar ao redor de 7.000 fotografías recollidas en 39 manuais dos catro cursos de secundaria.
Desta forma, Alba González mostra que os libros de texto céntranse nun modelo de corpo belo, saudable e perfecto e nun modelo de práctica físico-deportiva competitiva e de elite. Menos dun 1% das imaxes incluídas nestes manuais corresponden coas de persoas de idade avanzada, mentres que as persoas con discapacidade sitúase en 1,2%. Segundo esta investigadora, as imaxes recollidas trasladan aos estudantes un imaxinario que "non é realmente o que se atopa na sociedade".
Tal e como recolle Eduardo Muñiz no DUVI, a autora da tese afirma que o 22% das fotografías analizadas fan referencia a marcas, por exemplo, a través dos logotipos das pezas deportivas. González considera que isto mostra a obsesión que presentan as persoas adolescentes polas marcas, o denominado fenómeno do marquismo.