Deixemos de rosmar pola choiva, este domingo sairá o sol
Por Oskar Viéitez
O cabreo é xeneralizado. A habitual conversación de ascensor énchese de improperios ao falar da choiva. Cando estamos a piques de que empecen as primeiras mutacións e saian branquias e escamas, Meteogalicia abre unha xanela á esperanza e anuncia que este domingo sairá o sol.
O simulacro de primavera vivido durante os tres primeiros días de maio terá continuidade a próxima semana, ou iso quérennos facer crer á lexión de persoas fartas con tanto frío e humidade.
Mentras tanto, o venres Galicia manterase baixo a influencia dunha extensa zona de baixas presións centrada sobre Europa Central, que deixarán un réxime de ventos de compoñente oeste que aportará moita humidade. Así, os ceos estarán cubertos, con chuvias febles xeneralizadas, máis frecuentes na metade oeste. Os ventos soprarán de compoñente oeste frouxos con intervalos moderados no litoral.
A situación atmosférica será durante o sábado de transición entre as baixas presións que predominaron nas xornadas anteriores e o anticiclón que se agarda para o domingo. Deste xeito teremos unha xornada aínda con moitas nubes no ceo e chuvias febles, máis probables durante a mañá no noroeste. Os ventos soprarán frouxos de compoñente norte.
E por fin o domingo Galicia quedará na influencia das altas presións polo que o tempo será seco e estable.
Din os técnicos de MeteoGalicia que agardan bancos de néboa matinais en moitos puntos do interior e intervalos de nubes baixas no litoral norte nas primeiras horas do día, para quedar co avance da xornada cos ceos pouco anubrados ou despexados. As temperaturas mínimas descenderán, polo que a madrugada será fría, pero as máximas ascenderán, especialmente nas Rías Baixas situándose entre os 25 graos e os 30.