As alcaldesas de Moraña e Marín entran na nova executiva do PP de Galicia
Por Redacción
Creada e actualizada
Creada e actualizada
Dúas alcaldesas da comarca ocuparán cargos de responsabilidade na nova executiva autonómica do Partido Popular.
Trátase de María Ramallo, rexedora de Marín, e María Luisa Piñeiro, de Moraña, segundo o decidido no XVI Congreso do PP de Galicia, celebrado durante a fin de semana en Ourense.
Alberto Núñez Feijóo, confirmado como líder da executiva galega, terá como novo número dous a Miguel Tellado como secretario xeral, substituíndo no cargo a Alfonso Rueda. Tras o seu posto créanse catro vicesecretarías, unha delas para a alcaldesa de Moraña, María Luisa Piñeiro, a de Acción Electoral.
Será pois un posto de responsabilidade ante as inminentes citas coas urnas, coas eleccións xerais e autonómicas no horizonte.
María Ramallo ocupará pola súa banda una das 16 coordinacións de área, a de Territorio e Infraestruturas.
O cadro de organización do Partido Popular de Galicia complétase con 20 vogais natos, catro de designación do presidente e outros pertencentes ás organizacións de residentes no exterior. Na lista de vogais atópanse, entre outros, o portavoz local de Pontevedra, Jacobo Moreira, o delegado territorial da Xunta en Pontevedra, José Manuel Cores Tourís, a ex presidenta do Parlamento de Galicia, Pilar Rojo, a ministra de Fomento, Ana Pastor ou o anterior número 2 da cúpula galega e agora presidente provincial de Pontevedra, Alfonso Rueda.
Segundo deu a coñecer Jacobo Moreira, tamén entrará a formar parte da Xunta Directiva do PPdeG a número 2 do PP de Pontevedra, Aurora Cañizares. O seu traballo estará enfocado a temas de educación e esta entrada no partido a nivel autonómico non supoñerá ningún cambio nas súas responsabilidades a nivel local, de modo que "tendrá que redobrar esfuerzos".