O BNG toma Pontevedra como referencia e refúndase nun proxecto "para os que de verdade queren mollarse por este país"
Por Natalia Puga & Diego Torrado
O proceso Adiante co que o BNG afronta a súa refundación viviu este domingo o seu día grande en Pontevedra. Arroupada por máis de 500 militantes e simpatizantes e "fardando" da cidade do Lérez como "referente" para o nacionalismo galego, a portavoz nacional e, con case toda seguridade, candidata á Presidencia da Xunta de Galicia, Ana Pontón, reivindicou o seu proxecto político como a oportunidade para defender Galicia "sen dependencias de forzas estatais" e "sen sucumbir aos cantos de serea que nos levan a outros portos que non son os nosos".
O alcalde de Pontevedra, Miguel Anxo Fernández Lores, a quen no partido se defende como o gran referente ao ser o único rexedor nacionalista dunha das sete grandes cidades galegas, tamén reivindicou o traballo realizado na cidade do Lérez para defender que é posible levar a cabo o proxecto do BNG, un proxecto "para os que de verdade queren mollarse e traballar por este país".
"Nós, o BNG, temos fé no noso pobo", sentenciou Lores, que defendeu que hai 17 anos "tivemos fé en Pontevedra a pesar da aparencia de sociedade antegaleguista e dereitosa" e desde entón "o noso pobo ten fé en nós" e a candidatura nacionalista volveu gañar as últimas eleccións municipais. Con esa bagaxe, sostén que é "profundamente optimista sobre o futuro do BNG" e defenderá o seu proxecto "contra vento e marea".
Para conseguir ese futuro optimista que ve Lores a estratexia nacionalista "non se pode desviar" e debe seguir impulsando programas pensados "para o noso pobo, non para os supostos progres", en alusión velada ás novas forzas políticas que irrumpiron nos últimos tempos no panorama estatal. "O pobo galego non precisa magos nin profetas", mantén Lores, senón un proxecto "claro, intelixente e con decisión".
Ana Pontón, que se deu todo un baño de masas, tivo moi presente na súa intervención a Revolución dos Caraveis de Portugal, da que se conmemora o aniversario este luns, 25 de abril, e regalou os oídos dos pontevedreses ao asegurar que "Pontevedra é quen situou a Galicia no mapa internacional como cidade de referencia" e iso foi posible grazas a un goberno municipal nacionalista.
En clave autonómico e estatal, Pontón comparou as chamadas vella e nova política e sentenciou que a máis vella de todas é o "rancio centralismo español e a subordinación de Galiza", ante o que defende que tan só pode opoñerse un proxecto nacionalista, pois "ninguén vai vir de fora a sacarnos as castañas do lume".
Nun discurso no que recoñeceu "os erros e as dificultades do momento", pediu a implicación das bases na refundación que empezou o BNG e "tecer consensos duradeiros para unir a todas os e as nacionalistas. "Se queremos ser independentes e actuar como os pobos libres, precisamos ter organizacións independentes, cos seus centros de decisión en Galiza. Por iso avogamos por sumar a todas e todos os nacionalistas nunha candidatura común", defendeu no acto do Teatro Principal.
Nesta liña manifestouse Ramón Regueira, fundador da aula Castelao de Filosofía e simpatizante do BNG sen carné que cre que "nunca foi máis necesario un partido nacionalista de esquerda". Interveu nunha acto pensado para dar protagonismo á militancia e á mocidade, de modo que tamén tomaron a palabra Xosé Manuel Marcote, da Executiva nacional, e Zeltia Piñeiro, en nome de Galiza Nova, que confesou que se achegou ao nacionalismo cando se deu conta de que "non quero ter que emigrar como fixeron os nosos avós".