Lores e o período refractario
Por Oskar Viéitez & Mónica Patxot
Como cada penúltimo luns de cada mes, o Concello de Pontevedra acolleu este 18 de abril o seu pleno ordinario da corporación municipal. A novidade nesta ocasión veu coa estrea do novo sistema de gravación en vídeo dos pleno, unha substitución das actas escritas que será o preludio das anunciadas retransmisións por internet vía streaming das sesións políticas que acolle o Teatro Principal. Afirman que será o próximo verán.
Ao alcalde, Miguel Anxo Fernández Lores, correspóndelle dirixir o Pleno e é nesta función que tamén ten que actuar como realizador. Así, armado cunha tablet, o rexedor ía pulsando os distintos botóns para dirixir as cámaras de vídeo cara aos concelleiros cada vez que un edil tomaba a palabra, unha manobra que ten o seu truco.
E é que, segundo explicou Lores, cada vez que concede a palabra a un concelleiro, as cámaras teñen que encadrar ao edil e enfocar, e iso leva o seu tempo, "é coma un período refractario, diso sabemos algo os homes", dixo o alcalde en referencia ao tempo de descanso que ten que pasar un home despois de ter un orgasmo.
As coñas con motivo do "período refractario" acompañaron á corporación durante as máis de catro horas que durou o pleno.
"EL BNG QUIERE ROMPER ESPAÑA"
No Pleno, o goberno local conseguiu sacar adiante a súa proposta de modificación de crédito. Ao retirar a partida de 400.000 euros destinada á compra de composteiros a concelleira de Cidadáns, María Rey afirmou "ya no tengo motivos para votar en contra por lo que voy a apoyar la moción". Pola súa banda, os tres concelleiros do Partido Socialista tamén cambiaron a súa posición contraria a esta proposta absténdose na votación.
A modificación de crédito, de algo máis de 1,4 millóns de euros, servirá para financiar a compra de terreos en Mollabao e O Burgo, abonar á Deputación o último prazo da rolda urbana, pagar expropiacións pendentes e amortizar débeda.
O apoio de Cidadáns á proposta do BNG desatou unha dura crítica do concelleiro do Partido Popular, Rafael Domínguez, que sinalou ao Bloque Nacionalista Galego como unha formación "radical, separatista y anticonstitucionalista" e dixo que "Ciudadanos se vende al mejor postor" cando "apoya a un gobierno con sospechas de corrupción, pactando con los que desprecian lo español con un falso amor a Galicia", indicando que o Bloque "quiere romper con España".
Pola súa banda, o portavoz de Marea Pontevedra, Luís Rei, criticou a "pinza entre o nacionalismo galego e o nacionalismo español" polo apoio de Cidadáns á proposta do BNG.
PERSOAS OSTOMIZADAS
A moción presentada polo grupo municipal de Cidadáns para que o Concello de Pontevedra inste á Xunta de Galicia a adaptar os baños públicos da súa antiga sede en Benito Corbal aos requirimentos de saúde e hixiene das persoas ostomizadas saíu adiante por unanimidade, a pesar dos reparos iniciais do Partido Popular.
Desta forma, mellóranse as condicións de vida dun colectivo de persoas, máis de 4.000 en toda Galicia, que contan con moitas limitacións para estar longos espazos de tempo fóra da súa casa e cuxos requirimentos de accesibilidade non aparecen recollidos na lexislación nin nacional nin autonómica.
OUTRAS MOCIÓNS
A outra moción presentada por Cidadáns facía referencia ao uso por parte do grupo de goberno da casa consistorial para "fins partidistas". A iniciativa non foi aceptada por contar cos votos en contra de BNG, Marea e PSOE.
Ademais, como estaba previsto, a corporación municipal aprobou por unanimidade a moción presentada polos socialistas para instar á Xunta a arranxar as deficiencias detectadas no complexo deportivo do Pontillón do Castro; o mesmo que a iniciativa do PP para a remodelación do campo da Xunqueira, para o que xa existe un proxecto municipal para destinar 363.000 euros.
Os votos de BNG, Marea e PSOE impediron a aprobación da moción presentada polo PP para rebaixar polo menos un 25% o imposto da viñeta e tampouco saíu adiante a proposta popular para facer unha nova auditoría do estado das piscinas de Campolongo, ao entender os demais grupos que atrasaría o concurso para adxudicar a súa xestión. A oposición en bloque si se uniu para reclamar melloras nas parroquias de Campañó e Lourizán, a proposta de PP e Marea respectivamente.
Relacionadas:
-
Marea Pontevedra reclama a limpeza dos solares da antiga Tafisa
Por Redacción |
-
Monumental enfado de María Rey co PP por non apoiar unha moción de Ciudadanos
Por Alejandro Espiño |
-
O deterioro das instalacións do Pontillón de Castro a debate no Pleno de Pontevedra
Por Oskar Viéitez |
-
Unha reducción mínima do 25% na viñeta, proposta fiscal do PP
Por Redacción |