É mirar Meteogalicia... e deprimirse
Por Redacción
Coincidindo coa chegada da fin de semana este venres os ventos de compoñente sur irán achegando unha fronte co avance do día. Con esta situación, agárdanse ceos anubrados con chuvias intermitentes, localmente treboentas. As temperaturas descenderán, especialmente as mínimas. O ventos soprará de compoñente sur, frouxo en xeral, moderado no litoral atlántico a partir do mediodía.
Xa o sábado unha borrasca situarase sobre Galicia polo que persistirá a inestabilidade atmosférica. Así, os ceos estarán anubrados, con chuvascos xeneralizados, localmente fortes e acompañados de tormenta. As temperaturas ascenderán lixeiramente. O vento soprará moderado do nordés no litoral norte; no resto serán ventos de compoñente sur, frouxos, con intervalos de moderado.
Para o domingo diminúe a inestabilidade atmosférica. Con esta situación, agárdanse ceos con intervalos anubrados, con chuvascos illados e ocasionais. As temperaturas sufrirán un lixeiro descenso. Os ventos soprarán de compoñente norte, moderados no litoral norte e frouxos no resto.
De cara á semana que ven, Galicia permanecerá na influencia das baixas presións, manténdose alta a probabilidade de chuvia, aínda que disminuíndo lixeiramente os últimos días. As temperaturas mínimas sufrirán un progresivo descenso, manténdose as máximas con poucos cambios.