Poio tivo esta Semana Santa unha ocupación hoteleira do 54%
Por Redacción
A Concellaría de Turismo do Concello de Poio informou que os establecementos hoteleiros acadaron un 54% de ocupación durante a Semana Santa.
Aínda que en principio, as previsións de ocupación para estes días festivos eran positivas por parte dos hoteleiros, o mal tempo rexistrado sobre todo durante a fin de semana, afectou considerablemente á ocupación dos hoteis e apartamentos do municipio.
Combarro e San Xoán foron as parroquias que mellor ocupación rexistraron estes días, acadando unha media de ocupación do 75% durante toda Semana Santa.
OFICINAS DE TURISMO
Respecto ós visitantes que se achegaron ata as oficinas de turismo municipais acadouse a cifra de 825 persoas, cantidade superior nun 12,70% á rexistrada nas mesmas datas do pasado ano. En canto a procedencia dos visitantes un 96% corresponderon a turistas nacionais fronte a un 4% de visitantes internacionais.
De entre os visitantes nacionais destacaron en primeiro lugar, como ven sendo habitual, os procedentes de Madrid (31,29%) seguidos dos visitantes procedentes Castela e León (17,57%), País Vasco (9,05%) e Andalucía (6,52 %).
Tamén foi salientable o número de visitantes procedentes da nosa comunidade autónoma que representaron un 13,98% do total. En relación ós visitantes internacionais destacaron os turistas procedentes de países europeos como Francia, Portugal e Alemania.
A información recollida nas oficinas de turismo revela que a maior parte dos visitantes chegan en coche, salvo os numerosos grupos que o fan en autobús e os principais motivos de visita ó municipio son o conxunto histórico de Combarro, O Mosteiro de San Xoán de Poio e a gastronomía da zona.
En canto á información solicitada polos visitantes buscan preferentemente información dos atractivos do Concello de Poio (Combarro, Mosteiro de San Xoan, Petróglifos da Caeira, Casa de Colón), así como información xeral das Rías Baixas, de Pontevedra, Islas Cíes, Cambados, Cangas, O Grove ou Vigo.
Relacionadas:
-
Poio bate récord de turistas cun 85% de ocupación hoteleira na segunda quincena de xullo
Por Redacción |
-
Pontevedra tivo en Semana Santa unha ocupación hoteleira do 85%
Por Redacción |
-
O turismo en Sanxenxo "aguantou ben chaparrón" esta Semana Santa
Por Oskar Viéitez |
-
Cal é o atractivo turístico de Pontevedra durante a Semana Santa?
-
Estiman unha ocupación hoteleira do 82% na comarca de Pontevedra durante a Semana Santa
Por Oskar Viéitez |