Ence quere avanzar no plan "Olor Cero" na parada técnica, na que participan 2.011 traballadores
Por Redacción
Como cada mes de marzo, a fábrica de Ence de Lourizán realiza unha parada técnica durante 10 días na que está previsto incorporar novas tecnoloxías e realizar un mantemento das instalacións. Entre outras melloras, a dirección quere traballar no cumprimento dalgúns dos plans programados pola fábrica pasteira como é o caso do plan "Olor Cero".
Ao mesmo tempo, os equipos operativos da entidade traballan desde 2015 na mellora da integración na paisaxe da ría e xa se están realizando probas de campo para desenvolver o proxecto Novo Ciclo da auga no que compiten catro empresas expertas en tratamento de augas.
O obxectivo é que a fábrica reutilice a auga que capta do río Lérez para reducir nun 90% o seu consumo. Segundo informan fontes da factoría, a empresa que presente a mellor proposta comezará a executala nas próximas semanas, pero todo despois da parada.
Nesta parada técnica participan 2.011 traballadores, dos que 518 están vinculados a 40 empresas de Pontevedra e a súa comarca.
Todos estes empregados, segundo a empresa, colaboran cos 380 integrantes do persoal de Ence en Lourizán para levar a cabo investimentos na fábrica por valor duns 4,5 millóns de euros.
Desta cantidade, máis do 50% vai dirixido ao proxecto "Olor Cero" mentres que dous millóns de euros irán destinados a melloras en eficiencia e competitividade.