Os populares acusan o goberno local de actuar ilegalmente ao practicar o "timo do alcantarillado"
Por Redacción
O grupo municipal do Partido Popular cualifica como "timo do alcantarillado" o caso do cobro irregular a veciños de varias parroquias do rural pola conexión á rede de rede de sumidoiros sen que estivese en marcha este servizo. E entende que o Tribunal Económico Administrativo considera "ilegal" a forma de actuar do goberno local porque non se cumpre a normativa en dous casos nos que levou a cabo este cobro.
Jacobo Moreira, portavoz dos populares, sinalou que esgotarán as vías para que se cumpra o mandato aprobado no último pleno no que se requiría que se revisasen todos os recibos enviados e aplíquese o criterio do Tribunal Económico Administrativo.
Moreira apuntou que, polo momento, o goberno local non cumpriu con este procedemento amparándose noutro informe do Órgano de Xestión Tributaria, que segundo o representante popular queda supeditado aos expedientes do Tribunal municipal. Engadiu que llo trasladarán aos veciños de Campañó durante a tarde deste venres a partir das 20.30 horas no Centro Social de Sabarís.
Moreira entende que a situación é inxusta porque uns cidadáns están a pagar unha taxa que non lles corresponde e alerta de que na oficina popular detectaron máis casos nas parroquias de Verducido e de Salcedo.
ARQUIVO DE CASOS XUDICIAIS
O portavoz do PP, ao ser preguntado polo arquivo dos casos xudiciais nos que se investigaba ao goberno local polos contratos con Cespa e coa adxudicación da mellora de iluminación pública á empresa Setga, indicou que se trata dunha "boa noticia". Con todo, reclamou do concelleiro do BNG, Vicente García Legísima que se desculpase por acusar ao PP de ser quen estaba detrás da denuncia anónima pola adxudicación a Setga.
Ademais, apuntou que se gastaron 11 millóns de euros en catro anos para que esa empresa fixera unha serie de actuacións para potenciar o aforro enerxético na rede municipal e esa mellora, apuntou, segue sen detectarse.