Pontevedra porá en marcha un novo sistema de recollida selectiva de lixo nun ano
Por Anxo Lourido
Pontevedra contará, no prazo dun ano, cun novo formato de recollida e tratamento do lixo. Os concelleiros Carme da Silva e César Mosquera explicaron este mércores 2 que os servizos municipais xa están a traballar neste proxecto que busca a adaptación á situación concreta de Pontevedra.
Segundo explicaron os responsables municipais, o sistema baséase en experiencias europeas e nos consellos por parte dos especialistas en tratamento de residuos que, durante estas semanas, ofrecen charlas na Facultade de Compostaxe que promove a Deputación na Cidade Infantil Príncipe Felipe.
Carme da Silva apunta que Pontevedra dividirase en tres zonas para tratar os restos de comida. No rural, cada vivenda unifamiliar contará cun composteiro para o tratamento destes residuos orgánicos; nos barrios como A Parda, Salgueiriños, Gorgullón ou Monte Porreiro establecerase un composteiro colectivo para eses mesmos restos mentres que no centro urbano no que se inclúe o centro histórico realizaríase unha recollida separada desta materia orgánica.
O plan que manexa o goberno local centrarase na accesibilidade para facilitar que calquera veciño saiba en que colectores debe depositar os residuos. Agora vaise a analizar cada parte da cidade para determinar as necesidades que teñan para levar a cabo esta xestión do lixo. Desta forma, diferenciaríanse aquelas zonas con poboación envellecida ou con presenza de supermercados ou con empresas que produzan materiais singulares como plásticos.
Segundo explicou César Mosquera, se este sistema de separación de residuos funciona de maneira positiva abriríase a opción de rebaixar a taxa do lixo. Sinalou que o obxectivo se establece en que o 70% do lixo actual sexa reciclado.
PLANTA DE CANICOUVA
Este proceso, segundo os concelleiros, non estaría directamente relacionado coa posta en marcha da planta de compostaxe da Canicouva. Mosquera apuntou que os residuos poderían trasladarse a unha planta privada.
O concelleiro engadiu que a planta da Canicouva vería rebaixada as pretensións iniciais, de maneira que só atendería ao concello de Pontevedra e a súa capacidade situaríase en 6.000 toneladas de materia orgánica e sobre 4.000 toneladas de fracción seca mixta, material que se separaría e que seguiría enviándose a Sogama. Neste sentido, o lixo que se trasladaría á incineradora de Sogama sería o que non sexa reutilizable ou aquel que estivese mal separado.
Ao mesmo tempo, Carme da Silva afirmou que este proxecto leva paralelamente coas bases para a adxudicación do servizo de recollida de lixo. A actual concesionaria, Cepsa, finaliza o seu contrato co Concello pontevedrés en xuño de 2017.
Os dous concelleiros sinalaron que este plan de tratamento de residuos é pioneiro en Galicia e que pode converter a Pontevedra en referente na recollida e xestión de lixo. Para desenvolvelo iniciarán unha campaña de concienciación e de explicación a través dos diferentes colectivos sociais.
Relacionadas:
-
Os veciños de Campolongo piden ao Concello sumarse á experiencia piloto de composteiros comunitarios
Por Redacción |
-
A Cidade Infantil Príncipe Felipe, laboratorio de probas da compostaxe
Por Redacción |
-
Están dispostos os pontevedreses a sumarse ao novo sistema de reciclaxe?
-
Moreira rexeita o novo plan de residuos: "Cada uno volverá a tener un cerdo en casa para que coma los restos"
Por Anxo Lourido |
-
As Federacións veciñais interésanse polos composteiros para o tratamento do lixo
Por Mónica Patxot & Anxo Lourido |
-
O PP segue sen respostas sobre os traballos nos terreos da Canicouva
Por Redacción |
-
O novo sistema de recollida de lixo pode reducir á metade o custo real do servizo, segundo un estudo
Por Natalia Puga |
-
O PP critica que o goberno de Lores trate de xestionar o lixo sen consultar coa oposición
Por Redacción |
-
A Deputación explora nos ''compogaliñeiros"
Por Anxo Lourido |
-
Os informes técnicos negan a posibilidade de suspender as licenzas para plantas de compost
Por Redacción |