Moreira reúnese con veciños de Campañó e alértaos do cobro irregular de taxas da rede de sumidoiros
Por Redacción
O portavoz do PP local, Jacobo Moreira, acompañado polos concelleiros María José Rodríguez Teso e César Abal mantiveron un encontro con veciños de Campañó aos que trasladaron a información sobre os informes do Tribunal Económico Administrativo do Concello nos que se demostra que o goberno local cobrou de forma irregular as taxas correspondentes á rede de sumidoiros, aínda que nalgúns casos ese servizo non se prestou.
Os populares presentarán o vindeiro luns 22 unha moción na que se insta ao goberno de Fernández Lores a que revise todas as liquidacións emitidas e sexan revogadas e anuladas. Ademais, naqueles casos en que se realizase o pago, o Grupo Popular solicita que se lles reembolse aos veciños o diñeiro que non fose esixible segundo o acordo do Tribunal Económico Administrativo.
Segundo Jacobo Moreira, se o Pleno non aproba esta moción buscarán outras fórmulas para que os veciños teñan que facer fronte a estes recibos. Os responsables do PP manteñen aberta a súa oficina de atención aos afectados para despexar as dúbidas dos veciños.