O goberno local presume de superávit e o PP critica a incapacidade para executar os orzamentos
Por Redacción
Na comisión de Economía e Facenda presentouse o avance da liquidación de 2015 no que o goberno local fixo público un superávit de 3.146.000 euros, unha cantidade que segundo o concelleiro de Facenda, Raimundo González, ofrece unha capacidade de financiamento para o presente exercicio. Apuntou ademais que se cumpriu co teito de gasto cunha marxe de 1.350.000 euros.
Segundo indicou Raimundo González dun orzamento de 70.000.000 sobraron 1.350.000 euros, de maneira que a efectos de gasto en lugar de chegar "a nivel 100 acadouse o nivel 98", evitando que se teña que elaborar un plan económico financeiro. A cifra dese superávit tentarase destinar por parte do goberno local, segundo indicou o concelleiro, a investimentos financeiros sustentables.
Pola súa banda, os concelleiros do Partido Popular, Rafael Domínguez e César Abal sinalaron que estas cifras demostran a incapacidade do goberno de Fernández Lores para executar os seus propios orzamentos. Domínguez indicou que o goberno do BNG é "altamente incapaz, incompetente e improductivo".
Os populares insistiron en que, por exemplo, só se executou o 15% do orzamento da rede de rede de sumidoiros. En melloras de accesibilidade urbana no rural deixaron 1.300.000 euros sen executar, indicou Rafael Domínguez denunciando as dificultades que, segundo entende, ten o goberno local para facer fronte ao orzamento que aproban.