A UNED aposta polos idiomas e a educación nos seus cursos de extensión universitaria
Por Redacción
O prazo de matrícula das actividades de extensión universitaria do Centro Asociado á UNED xa está aberto. Co obxectivo de satisfacer as necesidades dos alumnos, ofértase unha gran variedade de actividades formativas enfocadas aos idiomas, a arte ou a educación, que comezarán en febreiro e finalizarán en abril. O custo de todas elas oscilará entre os 20 e os 50 euros.
En canto aos idiomas, a UNED propón aos seus alumnos un curso de inglés medio, outros de francés avanzado e un novo seminario de linguas de signos. Tamén se oferta un amplo abano de actividades no ámbito socio-educativo, como seminarios de TDAH, cursos sobre habilidades sociais ou xornadas sobre dano cerebral adquirido, entre outras.
Os alumnos tamén poderán gozar da segunda edición do curso de iniciación ao videoarte: Todo o que quixo saber do videoarte e non se atreveu a preguntar. Como reforzo, impartirase un seminario de introdución ao debuxo.
A finais de febreiro, realizaranse unhas xornadas sobre protocolo institucional e empresarial. A elas, seguiralle o curso Turismo experiencial: o turismo enológico e turismo gastronómico.
Alfonso Maíllo, experto en dereito penal e criminología, pechará esta oferta formativa cun seminario sobre as causas que inducen á delincuencia.