O tripartito de Ponte Caldelas aproba o orzamento municipal
Por Redacción
Os votos dos tres grupos que forman o equipo de goberno en Ponte Caldelas, PSOE, AVP e BNG, resultaron suficientes para aprobar o orzamento municipal para 2016.
As contas, que ascenden a un montante total de 3.750.00 euros, inclúen segundo explicaron os grupos de goberno un incremento do volume investidor de 193.000 a 389.000 euros e sitúase como eixo central o apartado social destinando "un 25% máis" e dotando ao Servizo de Axuda non Fogar 40.000 euros.
Ademais destaca a rebaixa de 8.000 euros no soldo do alcalde e a eliminación de dietas e quilometraxe, ao que se suma, sinalan desde o goberno local, "unha política de eficiencia na prestación de servizos e onde se contempla o aforro de 3.500 euros en combustible, 6.350 en telefonía e uns 1.500 euros en seguros".
"Son uns orzamentos coa maior carga social da historia, o maior investimento e a maior atención aos veciños e veciñas posto que primeiro foron escoitados ante de que elaboráramos este documento contable. Son, en definitiva, os orzamentos do cambio e do progreso do noso pobo", declarou o alcalde, Andrés Díaz.
OPOSICIÓN DO PARTIDO POPULAR
O Partido Popular de Ponte Caldelas expresou o seu rexeitamento a uns orzamentos que, entenden, "diminúen as partidas para o Plan Cultural municipal e para investimentos".
Jesús Rosón, Javier Sánchez, Ricardo Castro e Elsa Ares tomaron posesión como novos concelleiros populares, sinalando Ricardo Castro como portavoz que o goberno tripartito dispoñerá de máis fondos que o anterior.
Castro criticou o "descaro" do goberno local respecto dos investimentos en cultura ao propoñer unha redución do Plan Cultural "practicamente á metade, de 29.000 euros en 2015 imos pasar a 16.200 euros en 2016. Vaia maneira que teñen vostedes de apoiar á cultura", sinalou o edil do PP, para quen "a gran aposta" dos orzamentos será subir a partida de festas "de 50.000 euros en 2015 a 99.000 euros en 2016".
Ademais a oposición ve falsa a subida de investimentos "xa que o actual goberno contabiliza o diñeiro do Plan Concellos da Deputación e debería contabilizar tamén o diñeiro do anterior Plan Provincial de Obras e Servizos da Deputación Provincial".
Relacionadas:
-
O alcalde fai balance do primeiro ano de goberno e destaca a política de portas abertas aos veciños
Por Redacción |
-
O uso do Pavillón será gratuito para os veciños de Ponte Caldelas
Por Redacción |
-
Críticas do PP de Ponte Caldelas ao orzamento elaborado polo tripartito
Por Redacción |
-
Ponte Caldelas pretende aprobar o orzamento de "maior contido social" da súa historia, de 3,7 millóns
Por Redacción |