Comeza a funcionar a comisión de suxestións e queixas do Concello
Por Redacción
A partir de agora, unha comisión municipal supervisará as suxestións e queixas que presenten os cidadáns de Pontevedra ante o Concello. Estará presidida pola concelleira socialista Paloma Castro quen este mércores explicou os obxectivos que ten este novo organismo.
A comisión, que terá a mesma representación que o resto das que xa están activas no Concello -catro edís do BNG, dous do PP e un de PSdeG-PSOE, Marea e Ciudadanos- reunirase de forma trimestral para supervisar o estado de tramitación no que se atopen ditas queixas ou suxestións.
As iniciativas poderán ser presentadas pola cidadáns vía rexistro municipal ou a través da web do Concello de Pontevedra.
Derivaranse a unha oficina de atención ao cidadán "que no tiene por qué ser un espacio físico, sino uno o dos funcionarios que asuman esa tarea", segundo Paloma Castro.
Cada queixa ou suxestión, se é aceptada, supoñerá o inicio dun expediente municipal que debe resolverse no prazo máximo dun mes. A comisión funcionará como un órgano "fiscalizador", vixiando que se resolva o asunto e "si se repite en muchas ocasiones" poderá mesmo requirir a presenza do concelleiro da área correspondente para instarlle a actuar.
Paloma Castro sinalou que desde o mes de setembro aprobáronse un total de dez queixas e cinco suxestións. Outras oito queixas foron consideradas "inadmisibles" ao tratarse ou ben de cuestións que non dependen do Concello ou ben que se resolven cunha chamada ao servizo correspondente como "que falte una bombilla en algún sitio".