Un centro cultural ou un 'galpón' para ferramentas?
Por Redacción
O Centro de Interpretación do Patrimonio (CIPM) de Moraña converteuse nas últimas semanas nun almacén de ferramentas e outros materiais. Así o denuncia o BNG, formación que esixe que se corrixa esta situación.
Os nacionalistas aseguran que desde a posta en marcha do obradoiro de emprego, o Concello de Moraña comezou a utilizar este centro, situado en Santa Xusta, para acumular no seu interior todo tipo de materiais de obra,
Con estes feitos queda demostrado, segundo o portavoz do BNG, Marcos Suárez, que o PP "non ten o máis mínimo respecto pola cultura nin polas nosas instalacións culturais", ao tempo que critica a "total incapacidade para facer unha xestión exemplar e de posta en valor da nosa cultura patrimonial".
Para Marcos Suárez estes feitos son de "extrema gravidade", pois este centro de expresión cultural é agora un "galpón", desvirtuando a súa funcionalidade e o seu obxectivo.
"Este é o xeito que ten o PP de Moraña de entender a posta en valor do noso patrimonio. Non podemos consentir que sigan coa súa política de desfeita, de insulto e de desgoberno de Moraña", conclúe o voceiro nacionalista nun comunicado.