Fenosa e a Xunta buscarán solucións para evitar cortes de luz no Salnés
Por Redacción
Os alcaldes de Meaño, Sanxenxo e O Grove, Lourdes Ucha, Gonzalo Pita e José Cacabelos, mantiveron un encontro co delegado territorial da Xunta en Pontevedra, José Manuel Cores Tourís e o delegado de zona de Unión Fenosa, Fernando Val, coa intención de analizar as causas do corte na subministración eléctrica do pasado 1 de xaneiro.
O delegado territorial da Xunta quería coñecer as impresións dos rexedores dos municipios afectados e solicitarlles a súa achega sobre todos aqueles datos de que dispoñan en relación a outras deficiencias na subministración, engadindo as demandas e queixas presentadas polos propios cidadáns.
Analizouse a planificación de actuacións para completar a reparación da subestación de Vilalonga que, segundo Cores Tourís, neste momento é provisional. A distribuidora terá que responder dos labores de mantemento e dos protocolos de actuación realizados durante a avaría.
Tamén se indicou que as reclamacións dos afectados poden facerse directamente coa empresa a través do teléfono 900.111.999 ou a través do correo electrónico: csdistribucionelectricidad@gasnatural.com. As reclamacións, ademais, poden presentarse nas oficinas de Consumo da Xunta.
Unión Fenosa Distribución, segundo a información facilitada pola Xunta, comprometeuse a presentar un plan de actuacións que permitan avaliar, analizar e resolver as problemáticas que veñen rexistrando.
A Xunta aprobou a autorización para a construción de dúas novas obras, que acometerá Unión Fenosa, no Grove que permitirán repoñer os servizos en caso de avaría a través de sistemas de telecontrol.
UNIÓN FENOSA PROMETE INVESTIMENTOS
Segundo Unión Fenosa, a compañía leva investidos preto de 7,5 millóns de euros desde 2012 en mellora das instalacións eléctricas da comarca. Anuncian obras de desenvolvemento en redes de media e baixa tensión nos tres municipios, ademais de poñer en marcha un plan de inspección exhaustivo da rede de distribución da comaca para minimizar futuros incidentes. Esta empresa afirma que investirá máis de 1,4 millóns de euros en próximas actuacións de mellora.
SANXENXO PIDE O DESMANTELAMENTO PROGRESIVO DA SUBESTACIÓN DE VILALONGA
Pola súa banda, o alcalde de Sanxenxo, Gonzalo Pita reclamou a posta en marcha da subestación de Nantes, que se atopa finalizada e insistiu en que hai que derivar a estas instalacións as liñas de tensión que ofrecen subministración a Sanxenxo e á súa área de influencia.
Segundo Pita, os responsables de Unión Fenosa sinalaron que a liña de Vilalonga rexistrou no último ano máis de 48 multicortes e o alcalde entende que non se pode ofrecer este servizo aos veciños de Sanxenxo, tendo en conta a capacidade hostaleira do municipio. Indica ademais que en 2010 foron presentadas no Parlamento máis de 1.500 sinaturas de veciños que rexeitaban a subestación eléctrica no centro urbano de Vilalonga, situada xunto a unha gasolineira e no medio de vivendas.
Por iso, demanda que esa subestación na Lanzada quede cun servizo residual e totalmente illada da poboación, ao mesmo tempo que se derivan as liñas á de Nantes. Gonzalo Pita pide o cumprimento do compromiso adquirido en 2010 polo entón conselleiro ante os veciños de Vilalonga
TELMO MARTÍN RESPONSABILIZA AO GOBERNO LOCAL
Pola súa banda, o portavoz do grupo municipal do Partido Popular en Sanxenxo, Telmo Martín, "a resposta que deu ou alcalde de Sanxenxo respecto ao fallo da Subestación de Vilalonga é ou queixume dun mal xestor".
Nunha rolda de prensa celebrada este venres, Telmo Martín dixo que Sanxenxo necesita dun alcalde "que faga máis xestión e se anticipe aos problemas, con menos queixas". Para os populares existe unha solución "que o cuadripartito foi incapaz de xestionar" como é a posta en funcionamento da subestación do parque de Nantes. Segundo Telmo Martín o goberno local tivo "sete meses" para obter as autorizacións que faltan para instalar os tendidos de saída.
O concello de Sanxenxo cedeu no seu día os terreos e destinou 1,7 millóns de euros para a construción desa nova subestación. Ademais o PP de Sanxenxo cre "necesario" modernizar a subestación de Vilalonga, "blindándoa" como reiteradamente demandaron os veciños. Finalmente Termo Martín asegurou que este tipo de situacións están "a prexudicar o prestixio de Sanxenxo como municipio turístico".
Relacionadas:
-
Fenosa cortará a luz con motivo dos traballos de reparación da subestación de Vilalonga
Por Oskar Viéitez |
-
Gas Natural Fenosa culpa o temporal do corte de luz sufrido o sábado en Sanxenxo
Por Redacción |
-
A Xunta ofrece os servizos do Instituto Galego de Consumo aos afectados polo corte de luz do 1 de xaneiro
Por Redacción |
-
Os veciños de Sanxenxo, O Grove e Meaño recuperan a electricidade tras un inicio de ano a escuras
Por Redacción |
-
Unha avaría deixa sen luz 19.200 fogares de Sanxenxo, Meaño e O Grove
Por Redacción | Creada e actualizada