Queren que a Xunta organice cursos para sacar o carné de fitosanitarios
Por Oskar Viéitez
A entrada en vigor do Real Decreto sobre fitosanitarios, o pasado 26 de novembro, supuxo que só as persoas co carné de usuario expedido pola Xunta poidan adquirir produtos fitosanitarios.
A lista de compostos que requiren autorización é tan extensa que o permiso se fai imprescindible, tamén para aquelas persoas que se dedican á agricultura de autoconsumo e ás que agora xa non lles venden herbicidas ou sulfatos, entre outros compostos.
O problema é que a oferta de cursos tamén é moi reducida, polo que os pequenos agricultores están á espera de poder sacarse a titulación. A Xunta aínda non abriu o prazo para realizar anotacións. Espérase que empecen a mediados de febreiro.
A formación política Marea solicitou que o Concello de Marín solicite á Consellería do Medio Rural a organización como entidade colaboradora de cursos de aplicador/manipulador de produtos fitosanitarios de nivel básico, tanto en modalidade on line como en colaboración coas distintas asociacións do rural e que as clases presenciais sexan gratuítas.