O Nadal remata, pero segue a borrasca e veñen choivas persistentes
Por Redacción
As festas de Nadal chegaron ao seu fin e este xoves 7 de xaneiro retómanse as clases e comeza o período oficial de rebaixas no comercio, pero hai algo que non cambia: o tempo. A borrasca que leva días sobre Galicia continúa activa e, para este xoves, as previsións de Meteogalicia alertan de que haberá choivas persistentes que en Pontevedra -e tamén na Coruña- poden superar os 40 litros de auga por metro cadrado en 12 horas.
A fronte seguirá activa sobre Galicia nas primeiras horas do venres, deixando ceos cubertos con chuvias máis significativas no sur e no leste da comunidade. A partir do mediodía abriranse tímidos claros e quedará nunha situación de chuvascos, máis probables no noroeste.
Non se agardan cambios significativos para o sábado, cun tempo novamente marcado pola chuvia e polo vento. Os ceos permanecerán cubertos, con chuvias máis intensas e xeneralizadas pola tarde, cando poderán ter carácter localmente tormentoso especialmente no litoral.
En canto ás temperaturas, este xoves estarán en ascenso, especialmente as mínimas. Para o venres eo sábado volverán vivir outro descenso, máis acusado nas mínimas.
Ao longo deste xoves, o vento soprará forte do sudoeste e para o venres prevese que soprará frouxo do sudoeste en xeral, con intervalos de moderado no litoral da Coruña, onde aumentarán a fortes á noite. Xa o sábado, soprará forte do sudoeste, tanto no litoral como no interior, con refachos moi fortes en zonas altas e no litoral norte.