A Xunta ofrece os servizos do Instituto Galego de Consumo aos afectados polo corte de luz do 1 de xaneiro
Por Redacción
O Instituto Galego de Consumo da Consellería de Economía, Emprego e Industria ten un servizo permanente de atención ao cidadán no Paseo de Cervantes de Pontevedra e a raíz do acontecido na xornada do 1 de xaneiro en Sanxenxo, O Grove e Meaño, con preto de 20.000 fogares que pasaron horas sen luz por unha avaría, a Xunta ofrece os seus servizos aos afectados.
A consellería informou, a través dun comunicado remitido aos medios de comunicación, que asesorará na presentación de reclamacións aos usuarios afectados polo corte que tivo orixe na subestación de Vilalonga, en Sanxenxo. Ofrecerá, en concreto, información e asesoramento sobre os seus dereitos como consumidores e usuarios.
Consumo informará aos particulares sobre como presentar as reclamacións ante Gas Natural Fenosa polo tempo que pasaron sen luz e polos posibles danos que o corte ocasionou nos seus fogares e recomenda, xa como primeiro paso, que os veciños afectados conserven os documentos e tickets de compra que poidan xustificar as perdas sufridas. Farao tanto en persoa no edificio das Palmeiras do Paseo de Cervantes como por teléfono no número 900231123.
A Dirección Xeral de Enerxía xa anunciou este sábado que está a avaliar polo miúdo o incidente. O obxectivo da Xunta é garantir que o protocolo de actuación levado a cabo para restablecer o servizo foi o axeitado, así como determinar as causas do suceso e revisar os mantementos que se levaron a cabo na instalación durante os últimos meses.
Relacionadas:
-
Gas Natural Fenosa culpa o temporal do corte de luz sufrido o sábado en Sanxenxo
Por Redacción |
-
Fenosa e a Xunta buscarán solucións para evitar cortes de luz no Salnés
Por Redacción |
-
A Xunta revisará os últimos mantementos na subestación de Vilalonga, orixe do corte de luz do día 1
Por Redacción |
-
Os veciños de Sanxenxo, O Grove e Meaño recuperan a electricidade tras un inicio de ano a escuras
Por Redacción |
-
Unha avaría deixa sen luz 19.200 fogares de Sanxenxo, Meaño e O Grove
Por Redacción | Creada e actualizada