O ano 2016 chega en alerta laranxa por temporal nas Rías Baixas
Por Redacción
Se o ano 2015 se despediu con varios días de precipitacións e fortes ventos, o novo ano 2016 chegou ás Rías Baixas nunha situación aínda menos acolledora, cun temporal cargado de vento e choiva na terra e na costa. A Dirección Xeral de Emerxencias e Interior da Vicepresidencia da Xunta alerta dun temporal costeiro de nivel laranxa que afecta ao litoral da provincia de Pontevedra e de fortes ventos no interior dos municipios das Rías Baixas.
No caso do tempo en terra, durante toda a xornada deste venres hai alerta por un fenómeno meteorolóxico adverso por vento na zona das Rías Baixas. Os refachos de vento poderán acadar os 100 km/h e incluso superalos nas zonas máis elevadas.
No caso do temporal costeiro, está previsto que se manteña durante toda a xornada deste venres 1 de xaneiro e tamén o sábado día 2. Segundo as predicións da Axencia Estatal de Meteoroloxía (AEMET), o temporal comezou xa sobre as 6.00 horas da mañá nas zonas oeste e suroeste da provincia da Coruña e ao longo da mañá foise estendendo cara a costa de Pontevedra e o noroeste coruñés.
Durante toda a xornada haberá mar combinada do oeste con ondas que poderán oscilar entre os 6 e 7 metros de altura, chegando temporalmente aos 8. O vento soprará do suroeste e tamén oscilará entre forza 7 e forza 8, nalgúns momentos puntuais.
Co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos concellos costeiros; á Deputación, servizos provinciais e bombeiros, entre outros. Deste xeito, agárdase que se adopten as medidas oportunas para garantir a seguridade dos bens e das persoas.
Ademais, recordan á poboación a importancia de seguir as medidas de protección como evitar aproximarse a diques ou rompentes; retirar os obxectos que poidan caer á rúa dende os tellados, balcóns e fiestras e evitar pasar preto de edificios en ruínas, en construción, árbores, paneis publicitarios e outras situacións de risco. Ademais, aconséllase consultar a páxina web do CAE 112 (www.112galicia.org), que conta con información meteorolóxica e con enlaces de interese.
Relacionadas:
-
O Nadal remata, pero segue a borrasca e veñen choivas persistentes
Por Redacción |
-
Retiran un tronco e arrastres do río na ponte do Burgo
Por Diego Torrado |
-
Día 3 e segundo temporal do ano: este domingo, ollo coa choiva!
Por Redacción |
-
Tellados, fachadas e colectores, vítimas do primeiro temporal do ano
Por Diego Torrado |
-
A provincia rexistra 72 incidencias a causa do temporal
Por Redacción |
-
O 2015 despídese cunha semana de precipitacións e ventos fortes
Por Redacción |
-
As chuvias ofrecen unha tregua durante o Nadal e retornarán o domingo á noite
Por Redacción |
-
Din que o martes chega o inverno
Por Redacción |