Ponte Caldelas celebra un Festival Solidario e unha Feira de Artesanía a beneficio de Cáritas Interparroquial
Por Redacción
O pavillón dos deportes de Ponte Caldelas acolle este sábado 19 un Festival Solidario e unha Feira de Artesanía cuxa recadación se entregará a Cáritas Interparroquial de Ponte Caldelas para sufragar as accións que leva a cabo. Comezará ás 11 do mediodía e continuará ininterrompidamente ata as 22 horas. O prezo da entrada é de carácter voluntario.
A convocatoria presentouse este xoves 17 no Consistorio caldelano, contando coa presenza do alcalde Andrés Díaz, o responsable local de Cáritas, Manuel Lis e a monitora de zumba Adriana García Nascimento. Esta agradeceu a enorme colaboración que tivo entre os artistas participantes como Djembel Dance, os monitores da master class de zumba que se ofrecerá, así como dos grupos folclóricos que tamén se sumaron á proposta.
Abrirán o programa Os Coribantes, a partir do mediodía. A partir das 16 horas actuará a Asociación Cultural Tralovalo, seguiralle a partir das 17.00 horas o grupo Catro Ventos e ás 17.30 horas o grupo Laranxada de Limón. Os alumnos do IES de Ponte Caldelas ofrecerán varias coreografías compostas para a ocasión a partir das 18.00 horas e media hora máis tarde darase paso ás exhibicións de zumba. Na Feira de Artesanía participarán artesáns locais con artigos a prezos especiais.