Fin de semana solidario e conmemorativo da Banda de Gaitas Os Coribantes
Por Redacción
A Banda de Gaitas Os Coribantes de Buchabade ultima os preparativos para unha intensa fin de semana. Xa pecharon o cartel que conforma o concerto benéfico do Quilo Solidario, que se celebrará o venres 13 de novembro no pavillón municipal de Ponte Caldelas. Un día despois conmemorarán no mesmo lugar a súa primeira década de existencia cun xantar ao que se convidou aos alcaldes de Ponte Caldelas, Pontevedra, A Lama, Fornelos de Montes, Soutomaior e Cotobade.
O concerto solidario comezará ás 20.30 horas e contará coa participación, ademais dos propios Coribantes, do Grupo Limón, Laranxada de Limón, Malas Formas, Manoele de Felisa, Maianas, Silvia María, Suso Feixón, Bernardo Xosé e Emilio Espadañero. Durante o festival, así como nos Supermercados Froiz da zona, espéranse recoller polo menos 4.000 quilos de alimentos non perecedoiros, produtos que se repartirán entre familias con dificultades económicas de Ponte Caldelas, a través de Cáritas e os Servizos Sociais do Concello.
Durante a presentación do festival, que tivo lugar no Concello de Ponte Caldelas, fíxose referencia ao adianto da súa celebración e que responde "á necesidade de conseguir unha maior eficacia recadatoria de alimentos, xa que no Nadal, coas compras desas datas, resultaba un tanto complicado", sinalaba Lito Rodríguez, presidente da agrupación Os Coribantes. Ademais "este ano estaremos de forma presencial nos Supermercados Froiz animando á xente para colaborar e dándolles unha entrada para que co seu donativo leven xa unha entrada para asistir ao concerto", engadía.
Andrés Díaz, alcalde caldelano, agradecía a iniciativa solidaria de Os Coribantes de Buchabade, lembrando que desde o goberno local acordouse entregar durante o Nadal cheques solidarios de cen euros para familias en situación de especial dificultade económica.