A semana virá marcada por un anticiclón que deixará temperaturas agradables
Por Redacción
As Rías Baixas continuarán baixo a influencia anticiclónica, coas altas presións estacionarias ao norte da península, que achegan estabilidade segundo o servizo de Meteogalicia. Os ceos atoparanse pouco nubrados ou despexados durante a xornada do martes 29 de setembro, con temperaturas que non sufrirán cambios significativos situándose entre os 16 e os 26 graos centígrados. Os ventos soprarán do nordeste, frouxos no sur, con brisas costeiras.
As altas presións estarán situadas durante a xornada do mércores 30 sobre o Mar do Norte e non poderán impedir a entrada de aire frío nas capas medias e altas da atmosfera que provocará inestabilidade. Rexistraranse ceos pouco nubrados ou despexados, con intervalos de nubes baixas e néboas durante as primeiras horas da mañá. As temperaturas situaranse entre os 14 e os 24 graos. Os ventos soprarán frouxos variables no sur.
O anticiclón continuará movéndose cara ao sur, achegándose a Galicia ao situarse sobre as illas Británicas. Aumentará a estabilidade cun día de ceos despexados pero con entrada de néboas desde o mar polo litoral atlántico que afectarán durante toda a xornada á franxa costeira de Pontevedra. As temperaturas descenderán nas Rías Baixas por culpa da entrada de néboas situándose entre os 12 graos de mínimo e os 21 de máxima. A situación manterase de maneira similar durante o venres 2 de outubro.
Segundo as previsións de Meteogalicia, a fin de semana chegará con tempo inestable e a posibilidade de que se produza algún chuvasco.