Comeza en Carballedo a renovación das beirarrúas na PO-233
Por Redacción
Este martes darán comezo as obras de renovación e mellora das beirarrúas da estrada PO-233 Ponte Bora-Carballedo.
Previamente o delegado territorial da Xunta en Pontevedra, José Manuel Cores Tourís, en compaña do alcalde de Cotobade, Jorge Cubela, visitou a parroquia de Carballedo onde destacou que a Consellería de Medio Ambiente, Territorio e Infraestruturas investirá nesta actuación 100.000 euros.
Ten un prazo de execución de tres meses, polo que podería estar rematada a finais deste ano.
A renovación das beirarrúas faise necesaria polo deficiente estado de conservación que presentan, co pavimento en mal estado con lousas de formigón rotas ou moi deterioradas polo uso e zonas onde incluso carecen dalgunha loseta; ademais, presentan problemas de accesibilidade nalgúns vaos ou cruzamentos.
Con obxecto de solucionar estas carencias, demoleranse as beirarrúas existentes e executaranse novas beirarrúas e para cumprir as recomendacións vixentes de accesibilidade mellorarase o deseño das beirarrúas nas interseccións e executaranse vaos peonís e de acceso a garaxe con pendentes e materiais axeitados.