As concentracións de repulsa pola violencia de xénero celebraranse a partir de agora ante a Audiencia
Por Diego Espiño
Os últimos casos de violencia de xénero en España provocaron unha maior concienciación na cidadanía. Así o detectou a Mesa Contra a Violencia de Xénero, reunida este xoves en Pontevedra, ao producirse un aumento no número de denuncias e de medidas de protección ás vítimas.
Durante o mes de agosto na cidade se decretaron 12 ordes de protección e alonxamento, o que sitúa en 76 as ordes en vigor na actualidade.
Esta cifra supera os douscentos no caso de toda a demarcación xudicial de Pontevedra, o que supón "cen máis que en setembro do ano pasado" explicou en roda de prensa a concelleira de Benestar Social, Carmen Fouces.
Os participantes na mesa acordaron deseñar un protocolo de actuación e coordinación entre todos os axentes sociais e forzas de seguridade e tamén invitar de novo a representantes xudiciais e de fiscalía a que participen nestas reunións.
Tamén se reuniu o Consello da Muller do Concello de Pontevedra, decidindo trasladar a partir de agora as concentracións en repulsa da violencia machista, que se pasarán a celebrar ante a Audiencia Provincial para "simbolicamente decirlle á xustiza que precisamos da súa colaboración", sinalou Fouces.
No resto de asuntos tratados polo Consello destaca a incorporación ao mesmo da asociación 'Mulleres en pé' e a decisión de encagar ao Consello das Mulleres Novas a organización dos actos do próximo 25 de novembro.