Os afectados pola A-57 están preocupados ante o inminente inicio das obras anunciado pola ministra de Fomento, Ana Pastor, para a primeira quincena de outubro.

A plataforma Salvemos A Fracha celebrou este luns unha reunión informativa no lugar de Pintos na que o enxeñeiro técnico Roberto Ocampo explicou cómo se desenvolven os procedementos de inicio deste tipo de obras e resolveu as dúbidas dos veciños.

Non recibiron ningún dato sobre os terreos que vai ocupar a empresa San José nin sobre as expropiacións

Os afectados non recibiron ningún dato sobre os terreos que vai ocupar a empresa San José nin sobre as expropiacións que a construción da A-57 vai causar.

Este feito agrava a "preocupación e nerviosismo" que os veciños afectados veñen padecendo ante o "escurantismo" que segundo levan tempo denunciado, existe entorno a dito proxecto.

Os integrantes e técnicos da plataforma seguen defendendo que "a verdadeira circunvalación de Pontevedra é a AP-9" e continúan "asombrados" ante as declaracións do alcalde de Pontevedra, Miguel Anxo Fernández Lores de que o tráfico pesado en sentido norte-sur pasa polo centro de Pontevedra. Dende Salvemos A Fracha seguen mantendo a tese de que "o máis eficiente, ecolóxico e xusto para os pontevedreses e para os usuarios é que desprivaticen a AP-9, o que xa debería ser unha realidade dende hai anos a custe cero".

Por iso este colectivo cre que as declaracións de Ana Pastor son "unha falacia a prol dos intereses das grandes construtoras e non se entende por qué o goberno municipal se suma a este tipo de políticas".

No seu encontro coa ministra, o alcalde ligou, unha vez máis, a efectividade do tramo Vilaboa -  A Ermida coa construción dos seguintes tramos, neste sentido Salvemos A Fracha di que con iso Fernández Lores "mostra a súa preocupación de que non se executen".

Finalmente engaden que é "estraña tamén a preocupación que amosa neste encontro polos 'danos posibles á contorna'  e que fale de 'porta aberta' cando leva máis de un ano sen escoitar as demandas dos veciños".