Depilacións con caramelo, novas técnicas de masaxe ou maquillaxe de fantasía na estrea de Expobeauty
Por Redacción
O Recinto Feiral acolle desde este sábado unha nova edición da feira Expobeauty, un evento profesional na que se mostran as últimas tendencias no sector da estética persoal. Nesta primeira xornada, a depilación con caramelo, masaxes fisio-activos con alta tecnoloxía e sorprendentes maquillaxes de fantasía foron algúns dos protagonistas.
A concelleira de Promoción Económica, Anabel Gulías, e representantes de diferentes asociacións empresariais da cidade como AEMPE ou AJE asistiron ao acto de inauguración e coñeceron de primeira man estas novidades, entre as que tamén se atopan rotuladores para tapar as primeiras canas en casos de urxencia, sistemas de xestión para salóns de peiteado e técnicas para tratamentos corporais como maderoterapia.
No marco da feira, 'Carmelita' ofreceu unha demostración de depilación con pasta de caramelo, unha técnica suave e delicada a base de auga limón e azucre que elimina a lanuxe á vez que exfolia, purifica e hidrata a pel. 'Rollaction' foi outra das estrelas, un sistema de masaxe fisio-activo que permite traballar todas as capas da pel chegando a tonificar o músculo a través dunha "compresión, mobilización e canalización".
Tamén houbo demostracións de maquillaxe social con aerógrafo, decoración de uñas estilo 'pipe' con xel painting e pedras líquidas, e tratamentos corporais con arxilas naturais, entre outros.
Este domingo comezará, no marco desta feira, o congreso Galicia Look and Fashion coa presenza de importantes personalidades dentro do sector como Alberto Cerdán, o estilista das famosas por excelencia, ou Consolo Silveira, directora dunha das escolas de estética máis prestixiosas de España.
Así mesmo, haberá relatorios sobre tricoloxía capilar, nova orientación da perruquería como negocio, maderoterapia, láser de última xeración ou maquillaxe de noiva con aerógrafo. Haberá tamén dúas master class para profesionais, sobre o tratamento das imperfeccións da superficie cutánea, impartida por Consolo Silveira, e 'The Keys of Barbers', a cargo de José Navarro e Sebastián Forner, técnicos de Barberías con Encanto.
O I Campionato de Barbeiros, unha das novidades desta edición, pechará a xornada do domingo, na que tamén haberá desfiles e demostracións de tendencias de barbería para mulleres, homes e nenos.