Pontevedra, en alerta polo primeiro temporal da tempada
Por Redacción
Aínda é oficialmente verán pero o outono adiantouse uns días co primeiro temporal da tempada, que afecta especialmente á provinicia de Pontevedra durante a xornada deste martes 15 de setembro.
Á alerta laranxa activada por choivas, que poden chegar a ser de ata 90 litros por metro cadrado en 12 horas, a Axencia Estatal de Meteoroloxía engadiu nas últimas horas outra do mesmo nivel por vento, elevando a previsión inicial.
Os refachos de vento poden chegar a ser de ata 100 quilómetros por hora na provinicia.
As horas de maior incidencia, segundo os datos facilitados por MeteoGalicia, espéranse para as 16:00 e 17:00 da tarde e a partir das 21:00 horas.
Ante estas previsións o Concello de Pontevedra mantén activo un dispositivo especial de emerxencia composto por Bombeiros, Policía Local, Protección Civil e as concesionarias de limpeza e auga (Cespa e Viaqua), co obxectivo de poder atender calquera incidencia derivada do mal tempo.
Ademais os responsables municipais piden prudencia aos cidadáns en caso de ter que desprazarse en coche durante as próximas horas.